AFC AJAX di bishita na Kòrsou

Despues di un temporada nashonal i internashonal eksitoso e selekshon di AFC Ajax ta biaha pa Kòrsou di 17-21 di mei 2022. Delaster bia ku e selekshon tabata na e isla ta na 2010, pues a bira tempu pa konosé otro di nobo. Kòrsou for di 2020 ta partner ofisial di Ajax i ta prominente ku e logo riba e manga di e shùrt di e ekipo i durante partidonan ta visibel tur kaminda den e stadion i na televishon (inter)nashonal.

E kolaborashon eksitoso entre Kòrsou i AFC Ajax riba tereno deportivo durante e bishita aki tambe ta haña un karakter sosial ku entre otro aktividatnan rondó di desaroyo di talento pa hubentut. Lo konkluí e bishita ku un partido amistoso entre AFC Ajax i Team Kòrsou, un ekipo di okashon ku futbolista profeshonal ku roots na Kòrsou i hungadónan di Jong Holland.